कञ्चनपुर । सुदूरपश्चिमका गाउँबस्तीहरूमा यतिबेला गौरा पर्वको रौनक सुरु भएको छ । रोजगारीका लागि अन्यत्र गएका पनि घर फर्किएसँगै बस्तीभरि चाडपर्वको चहलपहल छ । नयाँ पहिरनमा सजिएका महिलाहरू माङ्गल र फाग गाउँछन् भने पुरुषहरूले खेल र देउडाले गाउँ रमाइलो बनाएका छन् ।
साउनको पुत्रदा एकादशीदेखि सुरु हुने यस पर्वलाई स्थानीय भाषामा गोःरा भनिन्छ । भाद्र महिनामा मनाइने गौरामा भगवान् शिवकी अर्धाङ्गिनी पार्वतीलाई गौरादेवीका रूपमा पूजिन्छ । शुक्ल पक्षमा परेको ‘उज्याली गौरा’लाई विशेष महत्व दिइन्छ ।
विवाहित महिलाले यस पर्वमा दुवधागो धारण गर्ने परम्परा छ । बिरुडा पञ्चमीदेखि सुरु हुने यो पर्व दुर्वाष्टमी (अठ्यावाली) का दिन विशेषरूपमा मनाइन्छ । यस दिन महिलाले सामूहिक पूजा गर्दै गौराको प्रसाद आकाशतर्फ फाल्छन् र देवीको आशीर्वादका रूपमा ग्रहण गर्छन् ।
गौरापछि गाउँमा पुरुष–महिला दुवैको सहभागितामा देउडा, धमारी, चैतजस्ता खेल चल्ने र अन्ततः विसर्जन गर्ने परम्परा छ । विशेषज्ञहरूका अनुसार गौरा केवल धार्मिक मात्र नभई सामाजिक, सांस्कृतिक र नारी सम्मानसँग जोडिएको मौलिक पर्व हो ।
इमान्दार संवाददाता 
प्रतिक्रिया