काठमाडौं । प्रधानमन्त्री केपी शर्मा ओली र चिनियाँ राष्ट्रपति सी चिनफिङबीच दुई पक्षीय भेटवार्ता भएको छ। चीनको थियानजिनस्थित अतिथि गृहमा भएको उक्त भेटवार्ता शाङ्घाई सहयोग संगठन (एससीओ) को शिखर सम्मेलनकै अवसरमा सम्पन्न भएको हो।
राष्ट्रपति सी चिनफिङको विशेष निमन्त्रणामा चीन पुगेका प्रधानमन्त्री ओली स्थानीय समयअनुसार दिउँसो ३:१५ बजे हिमालय एयरलाइन्सको विशेष विमानमार्फत थियानजिन विनहाइ अन्तर्राष्ट्रिय विमानस्थलमा अवतरण गरेका थिए। विमानस्थलमा उनलाई चीन सरकारका उच्च अधिकारी, नेपालका लागि चिनियाँ राजदूत चेन सोङ र चीनका लागि नेपाली राजदूत डा. कृष्णप्रसाद ओलीले स्वागत गरेका थिए।
भेटवार्तामा नेपाल–चीनबीचको परम्परागत मैत्रीपूर्ण सम्बन्धलाई अझ मजबुत बनाउने, आपसी सहयोगलाई नयाँ ढंगले अघि बढाउने र क्षेत्रीय स्थायित्वमा योगदान पुर्याउने विषयमा केन्द्रित छलफल भएको बताइएको छ।
शिखर सम्मेलनका क्रममा प्रधानमन्त्री ओलीले अन्य मित्रराष्ट्रका राष्ट्र तथा सरकार प्रमुखहरूसँग पनि द्विपक्षीय भेटवार्ता गर्ने कार्यतालिका तय भएको छ। यसक्रममा उनले सेप्टेम्बर २ मा बेइजिङमा चीनका उपराष्ट्रपति हान झेङसँग पनि भेटवार्ता गर्ने कार्यक्रम छ।
यसैगरी, अन्य मुलुकका नेताहरूसँगको भेटमा नेपाल र ती देशबीचका आपसी चासो, आर्थिक–व्यापारिक सहयोग, पूर्वाधार विकास, क्षेत्रीय तथा अन्तर्राष्ट्रिय मुद्दामा सहकार्य गर्ने विषयमा छलफल हुने जनाइएको छ।
इमान्दार संवाददाता 
प्रतिक्रिया