काठमाडौँ। जारी नेपाल प्रिमियर लिग (एनपीएल) को दोस्रो संस्करणअन्तर्गत आज (बिहीबार) दुई रोमाञ्चक खेल हुँदैछन्। पहिलो खेलमा काठमाण्डु गुर्खाजले पोखरा एभेन्जर्सको सामना गर्नेछ भने दोस्रो खेलमा सुदूरपश्चिम रोयल्स र चितवन राईनोज आमनेसामने हुनेछन्।

पहिलो खेल बिहान ११ः४५ बजे सुरु हुनेछ भने दोस्रो खेल दिउँसो ४ बजे कीर्तिपुरस्थित त्रिवि क्रिकेट मैदानमा तय गरिएको छ।

हालसम्म अपराजित सुदूरपश्चिम रोयल्स दश अंकसहित तालिकाको पहिलो स्थानमा रहँदै ‘प्लेअफ’ चरणमा प्रवेश गरिसकेको छ। बाँकी टिम भने प्लेअफ स्थानका लागि प्रतिस्पर्धामा रहेका छन्।

काठमाण्डु गुर्खाज आठ अंकसहित तालिकाको दोस्रो स्थानमा रहेको छ भने चार-चार अंक प्राप्त गरेको पोखरा एभेन्जर्स पाँचौं र चितवन राईनोज छैटौं स्थानमा छन्।

आजका दुवै खेलले तालिकाको अवस्था र प्लेअफ समीकरणलाई अझ रोचक बनाउने अपेक्षा गरिएको छ।