काठमाडौं । राष्ट्रपति कार्यालय शीतल निवासमा तोडफोड र लुटपाट गरेको आरोपमा प्रहरीले तीन जनालाई पक्राउ गरेको छ। प्रहरीका अनुसार पक्राउ पर्नेमा बैतडीको मेलौली नगरपालिका–७ का १८ वर्षीय विशाल सिंह कार्की, बैतडीकै सुर्नया गाउँपालिका–८ का १९ वर्षीय दीपक बोहरा, र बझाङको बित्थडचिर गाउँपालिका–१ का १९ वर्षीय हेमन्त बोहरा रहेका छन्।

उनीहरूले जेन–जी आन्दोलनका क्रममा राष्ट्रपति कार्यालय परिसरमा तोडफोड, आगजनी र सरसामान चोरी गरेको आरोपमा पक्राउ गरिएको प्रहरीले जनाएको छ। पक्राउ परेकामाथि चोरी र आपराधिक उपद्रव सम्बन्धी मुद्दा दर्ता गरी काठमाडौं जिल्ला अदालतमा पेश गरिएको छ।

प्रहरीले उनीहरूको साथबाट राष्ट्रपति कार्यालयमा प्रयोग भइरहेका प्रिन्टर, वाईफाई राउटर लगायतका सामग्रीहरू समेत बरामद गरेको जनाएको छ।