काठमाडौँ – जल तथा मौसम विज्ञान विभागले देशभर वर्षा र हिमपातको सम्भावना रहेको भन्दै आवश्यक सतर्कता अपनाउन सर्वसाधारण र सम्बन्धित निकायहरूलाई आग्रह गरेको छ। विभागले पोस्ट–मनसुन विशेष मौसम बुलेटिन जारी गर्दै आगामी दुई दिन मौसम प्रभावित हुने जानकारी दिएको हो।

पश्चिमी वायु र अरब सागरमा बनेको न्यून चापीय प्रणालीको संयुक्त प्रभावका कारण देशका विभिन्न भागमा वर्षा र हिमपात हुने सम्भावना रहेको बताइएको छ। बुलेटिनअनुसार आज रातिदेखि पर्सि बुधबार बिहानसम्म गण्डकी, लुम्बिनी, कर्णाली र सुदूरपश्चिम प्रदेशका केही स्थान तथा बाँकी प्रदेशका पहाडी र हिमाली भू–भागमा हल्कादेखि मध्यम वर्षा हुने अपेक्षा गरिएको छ।

त्यस्तै, गण्डकी, लुम्बिनी, कर्णाली र सुदूरपश्चिम प्रदेशका उच्च पहाडी तथा हिमाली भू–भागमा हल्कादेखि मध्यम हिमपातको सम्भावना रहेको छ। विशेष गरी केही स्थानमा भारी हिमपात हुन सक्ने चेतावनी पनि विभागले दिएको छ।

विभागले भनेको छ कि सम्भावित वर्षा र हिमपातले दैनिक जनजीवन, पर्वतारोहण, कृषि तथा पर्यटन क्षेत्रमा असर पार्न सक्छ। त्यसैले उच्च पहाडी तथा हिमाली क्षेत्रमा यात्रा गर्ने वा बसोबास गर्ने व्यक्तिहरूले विशेष सतर्कता अपनाउन आवश्यक छ।