काठमाडौं । गाजामा लागू भएको युद्धविरामसँगै स्थानीयहरू बिस्तारै आफ्ना भग्न घरतर्फ फर्किन थालेका छन्। शुक्रबारदेखि सुरु भएको अस्थायी युद्धविरामपछि दक्षिणी गाजाबाट हजारौं मानिस पैदलै उत्तरतर्फ, गाजा सिटीतर्फ अघि बढिरहेका छन्।
दुई वर्षअघि, २०२३ अक्टोबर ७ मा हमासको आक्रमणपछि सुरु भएको इजरायल–हमास युद्धले गाजा सिटीलाई पूर्ण रूपमा ध्वस्त बनाएको छ। अहिले त्यहाँ न बिजुली छ, न पानी, न विद्यालय, न अस्पताल—सारा पूर्वाधार नष्ट भइसकेका छन्। यद्यपि धेरैले भग्नावशेषबीच आफ्नो घरको निशान खोज्दै फर्किने प्रयास गरिरहेका छन्।
घर फर्किएका एक स्थानीयले भने, ‘मेरो घरको केवल भग्नावशेष भेटियो, तर यो नै अब मेरो सहारा हो।’ अमेरिकी राष्ट्रपति डोनाल्ड ट्रम्पको मध्यस्थतामा भएको युद्धविराम अन्तर्गत हमासले ७२ घण्टाभित्र जीवित इजरायली बन्दीहरूलाई रिहा गर्ने छ भने इजरायलले २५० प्यालेस्टिनी कैदी र १,७०० हिरासतमा रहेका व्यक्तिहरूलाई मुक्त गर्ने सहमति भएको छ।
इजरायलले हालसम्म आफ्नो ५३ प्रतिशत कब्जा क्षेत्रबाट सेना हटाउने घोषणा गरेको छ। यससँगै दैनिक ६०० राहत ट्रक गाजा प्रवेश गर्ने तयारी भइरहेको छ। युद्धविरामको कार्यान्वयनमा सहयोग गर्न अमेरिकाले करिब २०० सैनिक इजरायलमा तैनाथ गर्ने घोषणा गरेको छ।
यी अमेरिकी सैनिकहरू संयुक्त राष्ट्रसंघ (यूएन) र इजिप्टका टोलीसँग मिलेर काम गर्नेछन्। उनीहरूको जिम्मेवारी गाजामा राहत सामग्रीको सुरक्षित वितरण, युद्धविरामको निगरानी र समग्र सुरक्षाको समन्वय गर्ने रहनेछ।
१२ वर्षपछि अमेरिकी सेना कुनै विदेशी संघर्ष क्षेत्रमा औपचारिक रूपमा संलग्न हुन लागेको यो पहिलो घटना हो। तर अमेरिकी रक्षा मन्त्रालयले स्पष्ट गरेको छ— यी सैनिकहरू गाजाभित्र प्रवेश नगरी इजरायलको सीमाभित्रै रहेर निगरानी तथा समन्वय कार्यमा सहभागी हुनेछन्।
इमान्दार संवाददाता 
प्रतिक्रिया