कोपनहेगन । युरोपेली संघ (ईयू) का विदेश नीति प्रमुख काया कालासले गाजामा जारी युद्धका सन्दर्भमा इजरायलविरुद्ध प्रतिबन्ध लगाउने विषयमा सदस्य राष्ट्रहरूबीच एकमत नहुँदा तत्काल निर्णय सम्भव नभएको स्पष्ट पारेकी छन् ।
शनिबार कोपनहेगनमा सुरु भएको ईयू विदेशमन्त्रीहरूको बैठकमा सहभागी हुँदै उनले भनिन्, “आज कुनै ठोस निर्णय आउने देखिँदैन । यसले सदस्य राष्ट्रबीचको असहमति प्रष्ट देखाउँछ ।”
बैठकमा इजरायली प्रविधि स्टार्टअपहरूलाई दिइँदै आएको आर्थिक सहयोग स्थगित गर्ने प्रस्ताव एजेन्डामा परे पनि आवश्यक समर्थन जुट्न सकेको छैन । केही सदस्य राष्ट्रहरूले गाजामा उत्पन्न मानवीय संकटलाई सामूहिक रूपमा सम्बोधन गर्न प्रभावकारी कदम आवश्यक रहेको बताए पनि साझा निर्णयमा पुग्न कठिनाइ भइरहेको छ ।
डेनमार्कका विदेश मन्त्री लार्स लोके रस्मुसेनले इजरायलसँगको व्यापारिक सहकार्य रोक्ने, अतिवादी नेताहरूलाई प्रतिबन्ध गर्ने र अवैध यहुदी बस्तीबाट हुने वस्तु आयातमा रोक लगाउने उपायहरूको समर्थन गरे ।
संयुक्त राष्ट्रसंघका अनुसार गाजामा भोकमरीको अवस्था सिर्जना भएको छ । २०२३ को अक्टोबरमा हमासद्वारा इजरायलमा भएको आक्रमणपछि सुरु भएको युद्धमा इजरायली तथ्यांकअनुसार १,२१९ जनाको मृत्यु भएको थियो भने गाजामा अहिलेसम्म ६३ हजार २५ भन्दा बढी मानिस (धेरैजसो सर्वसाधारण) मारिएका छन् ।
इमान्दार संवाददाता 
प्रतिक्रिया