काठमाडौँ । जनमत पार्टी र नागरिक उन्मुक्ति पार्टीबीचको एकता घोषणा वैशाखमा हुने भएको छ। दुवै पार्टीले एकीकरण प्रक्रिया अन्तिम चरणमा पुर्याएका छन्। एकीकरणलाई अन्तिम रूप दिन दुवै पार्टीले कार्यदल गठन गरेका छन्, जसले प्रतिवेदन तयार गरिरहेको जनमत पार्टीका उपाध्यक्ष एवं कार्यदल सदस्य अब्दुल खानले जानकारी दिए।
उक्त प्रतिवेदन दुवै पार्टीका केन्द्रीय समितिमा पेश गरिनेछ, र केन्द्रीय समितिले अनुमोदन गरेपछि एकताको औपचारिक घोषणा गरिनेछ। एकताका प्रमुख बुँदाहरूमा अहिले नै सहमति भइसकेको छ। पार्टीको नाम ‘जनमत पार्टी’ रहनेछ भने अध्यक्षमा डा. सीके राउत रहनेछन्। सहअध्यक्षमा रञ्जिता श्रेष्ठ र संरक्षकका रूपमा रेशम लाल चौधरी रहने सहमति भइसकेको छ।
अन्य पदाधिकारीहरूको व्यवस्थापनबारे कार्यदल छलफल गर्दैछ, र यसबारे चैत महिनाभित्र टुंगो लगाइने छ। पार्टीको चुनाव चिह्न भने नागरिक उन्मुक्ति पार्टीको ‘ढकिया’ रहनेछ। त्यसपछि एकीकृत पार्टीको औपचारिक घोषणा गरिने बताइएको छ।
दुवै पार्टीबीचको एकता पश्चात् नयाँ दल संसद्को छैटौँ ठूलो दल बन्नेछ। हाल जनमत पार्टीका ६ र नागरिक उन्मुक्ति पार्टीका ४ सांसद रहेकोले एकतापछि १० सांसदसहित संसदमा यो दल मजबुत रूपमा प्रस्तुत हुनेछ।
इमान्दार संवाददाता 
प्रतिक्रिया