ढाका । बंगलादेशमा फेरि भिडले एक हिन्दु युवकको कुटपिट गरी हत्या गरेको छ । राजबारी जिल्लाको होसेनडाँगा गाउँमा बुधबार राति करिब ११ बजेको समयमा यो घटना भएको हो ।

प्रहरीका अनुसार मृतक २९ वर्षीय अमृत मण्डल उर्फ सम्राटका रूपमा पहिचान गरिएको छ । प्रहरीले अमृतलाई जबरजस्ती असुलीको आरोपमा भिडले मारेको जानकारी दिएको छ । उनी होसेनडाँगा गाउँकै बासिन्दा थिए ।

प्रहरीका अनुसार अमृतविरुद्ध पाङशा प्रहरी चौकीमा दुई वटा मुद्दा दर्ता थिए, जसमा एउटा हत्याको मुद्दा पनि समावेश छ । यसअघि डिसेम्बर १८ मा ढाका नजिकै हिन्दु युवक दिपु चन्द्र दासको हत्या भएको थियो । उनलाई रूखमा झुन्ड्याएर जलाइएको थियो ।

अमृतमाथि गिरोह बनाएर जबरजस्ती असुलीको आरोप

‘डेली स्टार’को रिपोर्टअनुसार स्थानीय बासिन्दाले अमृतमाथि आपराधिक गिरोह बनाएको आरोप लगाएका छन् । रिपोर्टका अनुसार उनी लामो समयदेखि जबरजस्ती असुली र अन्य आपराधिक गतिविधिमा संलग्न थिए । भारतमा लामो समय लुकेर बसेपछि हालै उनी घर फर्किएका थिए । अमृतले गाउँका बासिन्दा शाहिदुल इस्लामसँग जबरजस्ती असुलीको रकम मागेका थिए । डिसेम्बर २४ को रात अमृत र उनका साथीहरू शाहिदुलको घरमा पैसा लिन गएका थिए । परिवारका सदस्यहरूले ‘चोर’ भनी चिच्याएपछि स्थानीय मानिसहरू घटनास्थलमा पुगे र अमृतलाई कुटपिट गरे ।