काठमाडौँ । गाजा सहरमा हमासका सुरक्षाकर्मी र दुग्मुश परिवारका सशस्त्र सदस्यबीच भीषण भिडन्त हुँदा कम्तीमा २७ जनाको ज्यान गएको छ। इजरायली सैन्य कारबाही अन्त्य भएपछि गाजामा भएको यो सबैभन्दा ठूलो आन्तरिक हिंसात्मक घटना मानिएको छ।

प्रत्यक्षदर्शीका अनुसार गाजाको जोर्डनियन अस्पताल नजिक नकाबधारी हमास लडाकूहरू र दुग्मुश घरानाका लडाकूबीच तीव्र गोलीबारी भएको थियो। हमासद्वारा सञ्चालित गृहमन्त्रालयका एक वरिष्ठ अधिकारीले सुरक्षा बलहरूले ती सशस्त्र व्यक्तिहरूलाई घेराबन्दी गरी नियन्त्रणमा लिन खोज्दा भीषण झडप भएको जानकारी दिएका छन्। मन्त्रालयले ‘एक मिलिसिया समूहको आक्रमण’ मा आठ जना सुरक्षाकर्मीको मृत्यु भएको पुष्टि गरेको छ।

चिकित्सा स्रोतका अनुसार शनिबारदेखि सुरु भएको भिडन्तमा दुग्मुश परिवारका १९ जना र हमासका ८ लडाकूको ज्यान गएको छ। प्रत्यक्षदर्शीका भनाइअनुसार झडप गाजा सहरको दक्षिणी क्षेत्र टेल अल–हावामा भएको हो, जहाँ हमासका ३०० भन्दा बढी लडाकूहरूले दुग्मुश परिवारका सदस्यहरू लुकेर बसेको एक आवासीय भवनमा हमला गरेका थिए।

हमासद्वारा सञ्चालित गृहमन्त्रालयले स्थिति नियन्त्रणमा रहेको र शान्ति पुनःस्थापना गर्न प्रयास भइरहेको जनाएको छ।