आज : गते

ताजा शिर्षकहरु

चर्चित शिर्षकहरु

एक प्रहरीको मृत्यु, एसपीसहित १८ जनाको अवस्था गम्भीर, कसरी घट्यो घटना ?

प्रकाशित
2.2K
SHARES

काठमाडौ। विद्यार्थीमाथि यौन दुर्व्यवहार गरेको आरोप लागेका शिक्षकलाई कारबाहीको माग गर्दै आन्दोलित स्थानीयले आक्रमण गर्दा मोरङमा एक महिला प्रहरीको मृत्यु भएको छ।

लेटाङ नगरपालिका– ५ स्थित शिक्षा विकास माध्यमिक विद्यालयका शिक्षक ५६ वर्षीय मनोज पौडेलले कक्षा ७ मा अध्ययनरत छात्रामाथि यौन दुर्व्यवहार गरेको घटना सार्वजनिक भएपछि आइतबार स्थानीय आन्दोलित बनेका थिए।

त्यसैक्रममा विद्यालय पुगेका प्रहरी टोलीले शिक्षक पौडेललाई विद्यालयभित्रै सुरक्षा दिएपछि स्थानीय आक्रमणमा उत्रिएका थिए। आक्रमणबाट प्रहरी जवान उर्मिला श्रेष्ठको मृत्यु भएको हो ।

प्रदेश १ प्रहरी कार्यालयका प्रवक्ता एसपी नवीन राईले आक्रोशित स्थानीयबाट श्रेष्ठको घाँटीमा धारिलो हतियारले प्रहार भएको जानकारी दिए। श्रेष्ठलाई अस्पताल पु र्‍याएलगत्तै कोशी अञ्चल अस्पतालका चिकित्सकले मृत घोषणा गरेका थिए।

उनी दंगा नियन्त्रण गण दुहवी सुनसरीमा कार्यालय थिइन्। झडपमा मोरङ प्रहरी प्रमुख एसपी जनार्दन जिसीसहित १८ प्रहरी घाइते भएको एसपी राईले बताए । दुई स्थानीय पनि घाइते भएको उनको भनाई छ।

लेटाङ नगरपालिकाकी उपप्रमुख कृष्णकुमारी निरौलाका अनुसार शिक्षक पौडेलले कक्षा ७ मा अध्ययनरत छात्रामाथि बारम्बार यौन दुरव्यवहार गरेको घटना सार्वजनिक भएपछि आइतबार बिहानैदेखि लेटाङ तनावग्रस्त बनेको थियो।

ती शिक्षकले ४ फागुनमा फागु पूर्णिमाको दिन बालिकाको घरमै पुगेर पनि बलात्कार प्रयास गरेको उपप्रमुख निरौलाले बताइन्। आइतबार विद्यालय खुलेपछि पीडित बालिकाले रुँदै विद्यालयका अर्का शिक्षकलाई घटनाबारे जानकारी गराएकी थिइन्।

त्यसक्रममा अन्य विद्यार्थीले पनि सुनेका थिए । त्यसपछि विद्यार्थी र घटना थाहा पाएका स्थानीय आक्रोशित भएका थिए। उनीहरूले विद्यालयमा तोडफोड र आगजनी गरेको मोरङका प्रमुख जिल्ला अधिकारी काशीराज दाहालले बताए।

उपप्रमुख निरौलाले ती शिक्षकले यसअघिदेखि नै बालिकामाथि यौनजन्य हिंसा गर्ने गरेको आफूलाई जानकारी आएको बताइन् । ती शिक्षकले पहिलेदेखि नै ती नानीमाथि गलत दृष्टि लगाएका रहेछन्।

आमा नभएकी नानीलाई अनेक बहानामा दुव्र्यवहार गर्ने गरेका रहेछन्। होलीको दिन घरमै गएर बलात्कार प्रयास गरेछन्। आइतबार नानीले विद्यालयका अर्का शिक्षकलाई रुँदै सुनाउने क्रममा सबैले थाहा पाएपछि अप्रिय घटना भयो ।

दिनभर तनावग्रस्त बनेको लेटाङको अवस्था राति ९ बजे मात्र नियन्त्रणमा आएको उपप्रमुख निरौलाले बताइन् । स्थितिलाई नियन्त्रणमा लिन प्रहरीले हवाई फायर र अश्रु ग्यास प्रहार गरेको प्रदेश–१ प्रहरी कार्यालयका प्रवक्ता एसपी राईले जानकारी दिए।

सो क्रममा प्रहरी र स्थानीयबीच दाहोरो झडप पनि भएको उनले बताए। प्रहरीले आरोपी शिक्षकलाई आइतबारै नियन्त्रणमा लिएको छ। कसरि घट्यो लेटाङ घटना ?

एसपी जनार्दन जिसी, मोरङ । आइतबार लेटाङको शिक्षा सेवा माविका शिक्षक मनोज पौडेलले एक छात्रामाथि यौ’न दुर्व्यवहार गरेको आरोप लाग्यो। आरोप लागेपछि प्रहरीलाई पनि खबर आयो र स्थानीय लेटाङ इलाका प्रहरी कार्यालयबाट प्रहरी टोली आरोपित शिक्षकलाई पक्राउ गर्न भनी गएको थियो ।

प्रहरीको काम भनेको सुरुमा आरोपितलाई पक्राउ गरी घटनाको सम्बन्धमा अनुसन्धान गर्नु नै थियो । तर आरोपितलाई पक्राउ गर्न गएको प्रहरीमाथि बिहानै आ’क्रमण भयो । आरोपित शिक्षकलाई पक्राउ गर्न गएको प्रहरी उनलाई विद्यालयबाट बाहिर निकाल्नै नसक्ने अवस्थामा पुग्यो । यौ’न दुर्व्यवहारका आरोपित शिक्षकलाई पक्राउ गर्न गएको प्रहरीमाथि नै पटकपटक आक्रमण भएको थियो ।

स्थानीय युवाको समूहले यौन दुर्व्यवहारका आरोपित शिक्षकलाई आफूहरुले नै कारवाही गर्न पाउनुपर्ने भन्दै आन्दोलन र नाराबाजी गरिरहेका थिए । इलाका प्रहरीको टोलीलाई उक्त स्थान नियन्त्रणमा लिन र आरोपित शिक्षकलाई पक्राउ गर्न अप्ठ्यारो परेपछि उसले थप फोर्स मगायो ।

इलाका प्रहरी कार्यालयले थप फोर्स मगाएपछि हामीले जिल्ला र प्रदेश १ सशस्त्र प्रहरी गण (दंगा नियन्त्रण) बाट ५० जनाको फोर्स पनि मगायौँ । विद्यालय प्राङ्गणमा करिब ५ सयको हाराहारीमा स्थानीय, विद्यार्थी र अभिभावक उपस्थित भएका थिए ।

मोरङकै लेटाङ र सुन्दरहरैंचामा यसअघि दुईवटा बलात्कार हत्याका घटना भएका थिए, जसकारण स्थानीयहरु यौ’न दुर्व्यवहारको विषयमा ज्यादै आक्रोशित भएका थिए । आरोपित शिक्षकलाई विद्यालय प्राङ्गणमै ‘सवक सिकाउने’ भन्दै स्थानीय स्तरका युवाको उग्र समूह ज्यादै आक्रोशित बनिरहेका थिए ।

ती युवाको समूहलाई सम्झाउन हामीले पटकपटक प्रयत्न गर्यौ। आरोप पुष्टी भए कारवाही कानून र अदालतले गर्नेछ भनेर हामीले उनीहरुलाई बुझाउन खोज्यौँ । त्यसैका लागि स्थानीय भद्र भलाद्मी र जनप्रतिनिधिलाई पनि आग्रह गर्यौ । उनीहरुले पनि उक्त समूहलाई सम्झाउन खोजेकै थियो, तर उक्त भिड सम्झने अवस्थामा थिएन ।

हामीले आरोपित शिक्षकलाई प्रहरी चौकी लगेपछि भिड शान्त होला कि भनेर शिक्षकलाई दिउँसै प्रहरी कार्यालय लैजाने प्रयास पनि गर्यौं । तर आक्रोशित भिडले शिक्षकलाई पक्राउ गरी लैजान लागेको नभई आरोपितलाई बचाउन लागेको आरोप लगाइरहे । हामीले सम्झाउन खोजे पनि हाम्रो कुरा सुन्नै खोजेनन् । दिनभरको प्रयासपश्चात साँझ ७ बजेतिर मानिसहरु बिस्तारै आ–आफ्नो घरतिर लागे । हामीले धेरैलाई सम्झायौँ र आरोपितलाई लगेर अनुसन्धान गरी दोषी देखिए कारवाही गर्ने आश्वासन पनि दियौँ । अन्तिम समयमा स्थानीय युवाहरुको समूह पनि सहमत भएको जस्तो देखिए ।

त्यसपछि त्यहाँ रहेको विद्यालयको एउटा गेटमा रहेका मानिसहरुलाई हटाएर हामीले आरोपित शिक्षकलाई प्रहरीकै भ्यानमा राखेर इलाका प्रहरी कार्यालयमा ल्यायौँ । त्यतिबेला करिब ८ बजेको होला ।

आरोपित शिक्षकलाई ल्याएपछि त्यहाँ रहेका प्रहरीहरु पनि बिस्तारै बिस्तारै आ–आफ्ना कार्यालयतिर जाने क्रम चलिरहेको थियो । यद्यपि स्थानीयको आरोप प्रहरीले लगेपछि शिक्षकलाई उन्मुक्ति दिन्छ भन्ने थियो र शिक्षकलाई कडा कारवाहीको माग उनीहरुले गरिरहेका थिए । जसकारण प्रहरीमाथि सामान्य ढुङ्गामुढा भइरहेकै थियो ।

राति करिब ९ बजेतिर भिड बिस्तारै हट्दै गएपछि प्रहरी पनि आ–आफ्नो कार्यालयमा फर्किने क्रम जारी थियो। त्यही क्रममा हाम्रो प्रहरी जवान उर्मिला श्रेष्ठ लगायतको टोली पनि फर्किँदै थियो । फर्कने क्रममा विद्यालय नजिकै झाडीमा लुकेर बसेको उग्र युवाहरुको समूहले एक्कासी ढुङ्गामुढा गर्न थाले।

ढुङ्गा प्र’हारबाट प्रहरी जवान उर्मिला श्रेष्ठ घाइते बनिन् र त्यहीँ ढलिन् । सोही क्रममा युवाहरुको समूह आएर प्रहरीमाथि अन्धाधुन्ध आ’क्रमण गर्न थाले । घरेलु हतियार आदि लिएर आएका युवाको समूहले प्रहरी जवान उर्मिला लगायतका अन्य प्रहरीमाथि आ’क्रमण गरे । सोही क्रममा मृतक प्रहरी जवानमाथि धारिलो हतियारले घाँटीमा प्रहार गरिएजस्तो देखिन्छ, जसको कारण उनको मृत्यु भयो ।

जनताको शान्ति सुरक्षाका लागि खटिएका प्रहरीमाथि आक्रमण गरी ज्यान नै लिनुपर्ने कारण केही थिएन । तर दुःखको कुरा, जसको सुरक्षाका लागि प्रहरी खटिएका थिए, उनीहरुबाटै प्रहरी मारिए ।

​घटनाको मुख्य कारण र कारक भनेको यसअघिका दुईवटा घटना नै हुन् । यसअघि भएका दुईवटा बलात्कार र हत्याका घटनाले स्थानीय त्रसित र आक्रोशित थिए, यही क्रममा शिक्षकले नै यौ’न दुर्व्यवहार गरिएको कुरा बाहिर आएपछि भिड अनियन्त्रित बनेको थियो । आरोपित शिक्षकलाई त्यहीँ आ’क्रमण गर्ने योजनामा केही युवा थिए, जसलाई रोक्नु र अप्रिय घटना हुन नदिनु प्रहरीको कर्तव्य थियो । किनभने आरोप पुष्टी भएमा सजाय दिने अदालत हो, भिडले निर्णय गर्न हुँदैनथ्यो । तर दुईवटा बलात्कार र हत्याले स्थानीय आक्रोशितचाहिँ थिए ।

त्यही बुझेर नै हामीले लेटाङमा करिब १ सय ५० जना सुरक्षाकर्मी तैनाथ गरेका थियौँ । त्यसको नेतृत्व म आफैले गरेको थिएँ । दिनैभर प्रहरीमाथि आक्रमण भइरहेको थियो, यद्यपि प्रहरी ज्यादै संयमित भएकै थियो । भिड हटाउनै धेरै मुस्किल भएपछि हामीले राति ८ बजेतिर आरोपितलाई उद्धार गरी प्रहरी कार्यालयमा ल्याएका थियौँ । त्यसपछि घटना भयो, जतिबेला म पनि ईलाका प्रहरी कार्यालयमा आइसकेको थिएँ ।

के लागूऔषध दुर्व्यसनीले गरेका थिए प्रहरीमाथि आ’क्रमण ?
त्यहाँ यसअघिका दुई घटनाबाट आक्रोशित स्थानीयको समूहसँगै लागूऔषध प्रयोग गर्ने युवाहरुको समूह पनि धेरै छ । ग्रामीण भूभाग भएकाले प्रहरीको उपस्थिति पनि सधैँ हुन सक्ने कुरा भएन । तर उक्त क्षेत्रमा लागूऔषध प्रयोगकर्ताको सङ्ख्या धेरै रहेको र प्रहरीले बेलाबेलामा उनीहरुमाथि एक्सन लिएको पनि रहेछ ।

त्यही कारणले पनि प्रहरीप्रति त्यसक्षेत्रका युवा आक्रोशित भएको हुनसक्ने सम्भावना छ । लागूऔषध नियन्त्रण र कारोबारी तथा प्रयोगकर्तालाई पक्राउ र कारवाहीको कारण पनि प्रहरीप्रति त्यस्ता युवाहरुको धारणा नकारात्मक भएको पाएका छौँ । प्रहरीमाथि नै आक्रमण गर्नुको कारण त्यो पनि हुन सक्छ ।

सुकुमबासी बस्तीका युवाहरु पनि थिए आक्रोशित: आन्दोलनका क्रममा त्यसक्षेत्रमा रहेका सुकुमबासी बस्तीका युवा बढी आक्रोशित देखिएका थिए । अधिकांश युवाको शैक्षिक स्तर कमजोर रहेको र बेरोजगार पनि रहेका कारण कैयन् युवा कुलत वा अपराधमा पनि संलग्न रहेको बिगतका घटनाले देखाएका छन् । प्रहरीले पक्राउ र धरपकड गरेको कारण त्यस्ता युवा पनि प्रहरीप्रति नकारात्मक भएको हुनसक्ने हामीले अनुमान गरेका छौँ । त्यही कारणले युवाहरुले प्रहरीलाई नै निसाना बनाएको पो हो कि भन्ने सम्बन्धमा पनि अनुसन्धान भइरहेको छ ।

राजनीतिक कारणबारे पनि खोजी जारी: आइतबार प्रहरीमाथि नै आ’क्रमण हुनुको अर्को कारण राजनीतिक कारण पनि हो कि भनेर अनुसन्धान गरिरहेका छौँ । चुनावको मिति घोषणा भइसकेका कारण चुनावमा आफू अनुकुलको नतिजा निकाल्न पनि यसप्रकारको अपराध हुनसक्छ भन्ने कोणबाट पनि हामीले अनुसन्धान गरिरहेका छौँ ।

अर्को कुरा, आरोपित शिक्षकको राजनीतिक आस्था रहेको राजनीतिक दल र आक्रोशित अधिकांश भिडले आस्था राख्ने राजनीतिक दल पनि फरक हुनसक्छ, त्यही कारण राजनीतिक दाउपेचका कारण पनि भिड उग्र बनेको हुनसक्छ । यीबारे पनि हामी खोजी गर्दैछौँ।

प्रहरी चुकेको बचाउन नसक्नुमा मात्रै हो: तपाइँले प्रहरी कहाँ चुक्यो भनेर भन्नुभयो भने प्रहरी अन्त कतै चुकेको छैन । प्रहरीको अनुमान भनेको भिडले आरोपितलाई आक्रमण गर्न सक्छ भन्नेमात्रै थियो । भिडले प्रहरीमाथि नै आक्रमण गरेर ज्यान नै लेला भन्ने लागेको थिएन, त्यही अनुमानमा हामी चुकेका हौँ। नत्र प्रहरी दिनभर संयम भएकै हो । प्रहरीमाथि नै आक्रमण भएर मृत्यु हुँदासमेत प्रहरी संयम नै रहेको छ।

यदि प्रहरी चुक्ने र संयमता गुमाउने हो भने अर्को दुर्घटना पनि हुन सक्थ्यो । त्यसकारण भिडबाट हुनसक्ने आक्रमणबारे सचेत हुन नसक्नुबाहेक प्रहरी अन्यत्र कहीँ चुकेको छैन। अपराधी र आपराधिक समूहको योजनाबारे प्रहरी जानकार थिएन, त्यही नै प्रहरीको कमजोरी भयो । (रातोपाटीबाट साभार)

प्रतिक्रिया

आजको ट्रेन्डिङ