आज : गते

ताजा शिर्षकहरु

चर्चित शिर्षकहरु

हजुरबा, हजुरआमाको देशमा खेल्न पाउँदा खुसी लाग्छ- भारतीय कप्तान क्षेत्री

प्रकाशित
3.6K
SHARES

काठमाडौ। नेपालसँग तय भएका दुई मैत्रीपूर्ण खेलका लागि भारतीय टोली सोमबार नेपाल आइपुगेको छ। त्रिभुवन अन्तर्राष्ट्रिय विमानस्थलमा ओर्लिएपछि भारतीय टोलीका कप्तान सुनिल क्षेत्रीले नेपाली भाषामा नै सञ्चारमाध्यमलाई प्रतिक्रिया दिए।

प्रतिक्रिया दिने क्रममा उनले हजुरबा, हजुरआमा, आमाको देश नेपालमा खेल्न पाउँदा खुसी लाग्ने बताउँदै नेपाली टोलीको खेललाई पनि प्रशंसा गरे। नेपालमा आइपुगेपछि सञ्चारकर्मीसँगको अन्तर्वार्ताको सम्पादित अंश :

नेपालमा आएर मैत्रीपूर्ण खेल खेल्दै हुनुहुन्छ। साफ अगाडिको तयारी खेललाई कसरी लिनु भएको छ ? नेपालमा आएर खेल्न पाउँदा खुसी छौं। मैत्रीपूर्ण खेल खेल्न नेपालसँग त्यति सहज छैन। नेपालले निमन्त्रणा गरेकोमा धन्यवाद दिन चाहन्छु । यसको निकै महत्त्व छ।

अहिले कोभिडका कारण अवस्था कठिन छ। यस्तो अवस्थमा पनि नेपालले राम्रो हस्पिटालिटि दिएर बोलाउनु भएकोमा धन्यवाद दिन चाहन्छौं। मैत्रीपूर्ण खेल नेपालसँग खेल्न पाउँदा खुसी लागेको छ।

नेपाली टोलीलाई कसरी हेर्नुहुन्छ ? यसअघि पनि नेपालसँग खेलेका छौं। नेपाल बलियो टोली र कठिन प्रतिद्वन्द्वी हो। पछिल्लो समय राम्रो नतिजा निकालेर राम्रो प्रदर्शन गरिरहेको छ। एएफसीमा आर्मीले राम्रो गरेको छ। नेपालले सधै राम्रो खेल्ने गर्छ। अहिलेको अवस्था नेपाली टोली बलियो रहेको छ। टोली फर्ममा छ। राम्रो गर्ने टोली छ।

अहिलेको अवस्थामा कोरोना व्याप्त छ। कठिन अवस्थामा पनि भारतले साफ तयारीलाई कसरी अगाडि बढाएको छ ?
अहिले हाम्रो अवस्था निकै कठिन छ। कठिन तरिकाले हामी अगाडि बढिरहेका छौं।

किनभने भने हाम्रो लिग खतम भइसकेको छ। दुई क्लबले मात्र अभ्यास गरिरहेका छन्। साफका लागि खेलाडी पर्याप्त मात्रामा अभ्यासमा थिएनन्। दुई हप्तादेखि तयारी गरेका छौं। सिनियर खेलाडी पनि कमैमात्र छन्।

नेपालसँग हुने दुई मैत्रीपूर्ण खेल हाम्रो लागि निकै महत्त्वपूर्ण छन्। यी दुई खेलपछि हामी साफका लागि माल्दिभ्स जाने हो। अहिलेको अवस्थामा धेरै सिनियर खेलाडी एएफसी कपमा खेलेका छन्। दुईवटा क्लबका ८ खेलाडी माल्दिभ्समा खेलिरहेका छन्।

जसका कारण हामी समयमा नै अभ्यास थाल्न सकेनौं। जुनियर खेलाडी टोलीमा समावेश भएका छन्। उनीहरुको प्रदर्शनबाट कोच सन्तुष्ट छन्। राम्रोभन्दा राम्रो खेल्ने हाम्रो लक्ष्य छ। म पनि पछिमात्र टोलीमा आबद्ध भएको हुँ।

कोचलाई मात्र थाहा छ, को खेलाडी खेलाउने को खेलाडीलाई नखेलाउने भन्ने । नेपालमा तपाईंका ‘फ्यान’ पनि धेरै छन्। नेपालमा खेल्दा कस्तो अनुभव हुन्छ ? नेपालमा खेल्न पाउँदा मलाई निकै खुसी लाग्छ।

एउटै भाषा छ। हजुरबा, हजुरआमा यहीबाट हुनुहुन्थ्यो। ममी पनि यहीँबाट हुनुहुन्छ । यस्तो अवस्थामा पनि सबैजना सुरक्षित हुनुहुन्छ। सबै नेपालीलाई सुरक्षित भएर बस्न आग्रह गर्छु।

भारतले नेपालसँग त्रिपुरेश्वरस्थित दशरथ रंगशालामा भदौ १७ र २० गते प्रतिस्पर्धा गर्दैछ। बन्द रंगशालामा आयोजना हुने प्रतियोगितालाई नेपालले साफ तयारीको रुपमा हेरेको छ। माल्दिभ्समा आयोजना हुने साफ च्याम्पियनसिप अक्टोबर १ देखि १६ सम्म आयोजना हुँदै छ।

नेपालले छिमेकी देश भारतसँग सन २०१८ को विश्वकप छनोट अन्तर्गत भएको खेलमा प्रतिस्पर्धा गरेका थिए। उक्त खेल गोलरहित बराबरीमा सकिएको थियो।

प्रतिक्रिया