आज : गते

ताजा शिर्षकहरु

चर्चित शिर्षकहरु

गुम्यो ओली सरकारको दुई तिहाइ, समर्थन फिर्ता लिने समाजवादी पार्टीको निर्णय

प्रकाशित
1.4K
SHARES

काठमाडौं । सरकारबाट बाहिरिएसँगै समाजवादी पार्टी नेपालले केपी ओली नेतृत्वको सरकारलाई दिएको समर्थन फिर्ता लिएको छ । बुधवार(आज) बसेको दलको केन्द्रीय कार्यकारीणी समिति बैठकले सरकारलाई दिएको समर्थन फिर्ता गर्दै प्रतिपक्षमा बस्ने निर्णय गरेको हो । समाजवादी पार्टी नेपालका महासचिव एवं संगठन विभाग प्रमुख गंगा श्रेष्ठले कार्यकारीणी बैठकले सरकारलाई दिएको समर्थन फिर्ता लिने निर्णय गरेको जानकारी दिए ।

‘सरकारबाट बाहिरिएपछि समर्थन दिइरहेन कुरा भएन,’महासचिव श्रेष्ठले भने,’समाजवादी पार्टीले सरकारलाई दिएको समर्थन फिर्ता लिँदै संसदमा प्रतिपक्षीको बेञ्चमा बस्ने निर्णय गरेको छ ।’ समाजवादीले केपी ओली नेतृत्वको सरकारलाई दिएको समर्थन फिर्ता लिएसँगै ओली सरकार बहुमतको सरकार मात्र बनेको छ । उसको दुई तिहाइ हटेको छ ।

केपी ओली नेतृत्वको सरकारलाई दुई तिहाइको सरकार बनाएको उपप्रधान एवं कानूनमन्त्री उपेन्द्र यादवको दल समाजवादी पार्टीले मंगलबार(हिजो) आकस्मिक रुपमा सरकारबाट बाहिरिने निर्णय गरेको थियो । समाजवादी पार्टीको पदाधिकारी बैठकले सरकार छोड्ने निर्णय गरेपछि उपप्रधानमन्त्री यादव र सहरी विकासमन्त्री इस्तियाक राईले राजीनामा दिएका थिए ।

सोमबारको मन्त्रिपरिषद् बैठकमा कानूनमन्त्रीको हैसियतमा आफूले संविधान संशोधनको प्रस्ताव प्रस्तुत गर्दा प्रधानमन्त्री केपी ओलीले अस्वीकार गरेको र यसअघि सरकारमा सहभागी हुने क्रममा गरिएको दुई बुँदे सहमति भंग भएको यादवले उल्लेख गरेका छन् । यसअघि मन्त्रिपरिषद् पुगर्नठन गर्ने क्रममा प्रधानमन्त्री ओलीले उपेन्द्र यादवलाई स्वास्थ्यबाट कानून मन्त्रालयमा सरुवा गरेका थिए । त्यसबेला नै प्रधानमन्त्रीले समाजवादी दललाई सरकारबाट हटाउन खोजेको कतिपयको आकलन थियो ।

समाजवादी पार्टीले मन्त्रिपरिषदबाट बाहिरिएपछि सरकारलाई दिएको समर्थन फिर्ता लिने निर्णय गर्दा पनि नेकपा सरकारले बहुमत गुमाउने अवस्था भने आउँदैन । समाजवादीले समर्थन फिर्ता लिँदा पनि ओली सरकारसँग बहुमत भने कायमै रहनेछ र उसमाथि कुनै गणितीय संकट भने आउने छैन ।

अहिले प्रतिनिधिसभाको कुल सदस्य संख्या २७५ छ । यसमध्ये दुई तिहाई बहुमतका लागि १८३ मत चाहिन्छ । समाजवादी पार्टीले समर्थन फिर्ता नलिँदासम्म ओली सरकारको पक्षमा १९४ सांसद छन् । समाजवादीका १७ जनाले समर्थन फिर्ता लिए भने सरकारको पक्षमा १७७ सांसद रहने छन्, जुन दुई तिहाईभन्दा थोरै मात्र कम हो ।

समाजवादीसँगको सहमतिले धक्का !
सत्तारुढ दल नेपाल कम्युनिस्ट पार्टीले राष्ट्रिय सभा निर्वाचनका लागि प्रदेश दुईमा राष्ट्रिय जनता पार्टीसँग दुई बुँदे सहमित गरेको थियो । राष्ट्रिसभा सदस्य निर्वाचनमा आफ्ना उम्मेदवारलाई विजयी गराउन राजपाले नेकपासँग सहमति गरेसँगै समाजवादीलाई समेत एक सिट घाटा लागेको छ ।

यसले गर्दा सरकारमा रहेको दल समाजवादी असन्तुष्ट बनेको थियो । सत्ता सहकार्य गरिरहेको दलसँग कुनै सल्लाह नगरि अर्को मधेशवादी दल राजपासँग सहकार्य गरेपछि समाजवादीलाई सरकारका बस्न नैतिक संकट उत्पन्न भएको राजनीतिक विश्लेकषकहरुको भनाइ थियो ।

कतिपयले भने समाजवादीलाई सरकारबाट बाहिर पठाएर राजपालाई सरकारकारमा ल्याउन नेकपाले राजपासँग सहमतित गरेको बताउँदै आएका छन् । तर राजपाका अध्यक्ष मण्डलका संयोजक राजेन्द्र महतोले नेकपा र राजपाबी भएको दुई बुँदे सहमतिले संघीय सरकारमा जाने बाटो नखुल्ने बताएका छन् ।

प्रतिक्रिया