आज : गते

ताजा शिर्षकहरु

चर्चित शिर्षकहरु

बाग्लुङ जिप दुर्घटनाप्रति प्रचण्ड र देउवाद्वारा दु:ख व्यक्त

प्रकाशित
863
SHARES

बागलुङ । जिल्लाको बडिगाड गाउँपालिका-७ भीमगिठेमा जिप दुर्घटना परी मृत्यु भएकाहरुप्रति नेपाल कम्युनिस्ट पार्टी (नेकपा)ले गहिरो दुःख व्यक्त गरेको छ । नेकपाका अध्यक्ष पुष्पकमल दाहाल प्रचण्डले दुर्घटनामा मृत्यु भएका १४ जनाप्रति श्रद्धाञ्जली व्यक्त गर्दै दुर्घटनाको खबरले मर्माहत बनाएको भन्दै घाइतेहरुको शीघ्र स्वास्थ्य लाभको कामना गरेका छन् ।

देशका विभिन्न भागमा हुने यस प्रकारका सवारी दुर्घटनाहरु नेपाली सडकको दूरावस्था, पुराना सवारी साधनको प्रयोग र सवारी सञ्चालनमा देखिएको हेलचेक्राइ समेतका कारण हुँदै आएको भन्दै प्रचण्डले सवारी दुर्घटनालाई न्यूनीकरण गर्न आवश्यक पहलका लागि सम्बन्धित क्षेत्रको विशेष ध्यान जान जरुरी रहेको बताए ।

अध्यक्ष प्रचण्डले उक्त दुर्घटनमा परी निधन भएकाहरुका परिवारजनका लागि उचित क्षतिपूर्तिका साथै बेपत्ताको खोजी र घाइतेहरुको निशुल्क स्वास्थ्य उपचारको व्यवस्था गर्न सरकारसँग माग पनि गरेका छन् । मंगलबार गुल्मीबाट बागलुङको निसिखोला जाँदै गरेको जिप बडिगाड गाउँपालिकाको भीमगिठेस्थित सडकबाट करिब ५ सय मिटर तल खोलामा खस्दा १४ जनाको मृत्यु भएको छ । जिप दुर्घटनाका गम्भीर घाइते तीन जनालाई नेपाली सेनाको हेलिकोप्टरबाट उद्धार गरी काठमाडौँस्थित त्रिवि शिक्षण अस्पताल लगिएको छ ।

घाइते नवलपरासी बर्दघाट–२ बस्ने १८ वर्षीय जीवन कार्की, गुल्मी इस्मा गाउँपालिका–४ का ८ वर्षीय हिमाल कार्की र सोही स्थानका २४ वर्षीय निमा केसीलाई थप उपचारका लागि काठमाडौँ पठाइएको प्रहरीले जनाएको छ । दुर्घटनामा परेका एकजना बेपत्ता भएको जिल्ला प्रहरी कार्यालयका प्रमुख प्रहरी उपरीक्षक नवराज भट्टले जानकारी दिए । स्थानीयका अनुसार बेपत्तालाई बडिगाड खोलाले बगाएको हुनसक्ने आशंका गरिएको छ ।

जीप दुर्घटना परी मृत्यु भएकाहरुप्रति नेपाली कांग्रेसले पनि दुःख व्यक्त गरेको छ । कांग्रेस सभापति शेरबहादुर देउवाले दुर्घटनामा मृत्यु भएका १४ जनाप्रति श्रद्धाञ्जली व्यक्त गर्दै घाइतेहरुको शीघ्र स्वास्थ्य लाभको कामना गरेका छन् । साथै सभापति देउवाले पछिल्लो समय एकछि अर्काे गर्दै ठूलो दुर्घटना भएको भन्दै तत्काल एक कार्यदल गठन गरी घटनाको छानबिन गर्न सरकारसँग माग गरेका छन् ।

मंगलबार गुल्मीबाट बागलुङको निसिखोला जाँदै गरेको जीप बडिगाड गाउँपालिकाको भीमगिठेस्थित सडकबाट करिब ५ सय मिटर तल खोलामा खस्दा १४ जनाको मृत्यु भएको छ । दुर्घटनामा ३ जना गम्भीर घाइते भएका छन् भने एक जना बेपत्ता भएको बागलुङ प्रहरीले जनाएको छ ।

प्रतिक्रिया