आज : गते

ताजा शिर्षकहरु

चर्चित शिर्षकहरु

प्रधानमन्त्रीको स्वास्थ्यका कारण प्रचण्डको चीन भ्रमण रोकियो

प्रकाशित
0.9K
SHARES

काठमाडौं । सत्तारुढ नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’को चीन भ्रमण एकाएक रद्द भएको छ ।  प्रधानमन्त्री केपी शर्मा ओलीको स्वास्थ्य स्थितिका कारण नेकपा अध्यक्ष प्रचण्डले आफ्नो आसन्न चीन भ्रमण रद्द गरेको नेकपा स्रोतले जानकारी दियो । प्रधानमन्त्री ओलीसँग भेट गरेको भोलिपल्ट प्रचण्डले चिनियाँ राजदूतलाई बोलाएर आफू चीन जान नसक्ने जानकारी दिएका हुन् ।

नेकपा अध्यक्ष प्रचण्ड ६० सदस्यीय नेकपाका नेताहरुको अगुवाई गर्दै मंसिर २४ गते चीन जाने कार्यक्रम थियो । चीनमा नेकपाका नेताहरुले चिनियाँ कम्युनिष्ट पार्टीका नेताको अनुभव सुन्ने र एक साताभन्दा बढी विभिन्न अवलोकनहरु गर्ने कार्यक्रम थियो । प्रचण्डले कार्यक्रमको उदघाटन गरेर वीचैमा र्फकने गरी जान तयारी गरेका थिए । तर, सोमबार प्रधानमन्त्री ओलीलाई भेटेपछि उनले मंगलबार चिनियाँ राजदूतसँग आफू भ्रमणमा जान नसक्ने बताएका हुन् ।

प्रधानमन्त्री ओली विरामी अवस्थामा अस्पतालमा रहेको हुनाले यस्तो बेलामा विदेश जानु उपयुक्त नहुने नेकपाका शीर्ष नेताहरुवीच छलफल भएपछि प्रचण्डले चिनियाँ राजदूतलाई परिस्थितिबारे जानकारी गराएको नेकपाको उच्च स्रोतले अनलाइनखबरलाई बतायो ।

यसैवीच, एपेन्डिसाइटिसको अप्रेशन गरेर अस्पतालमै आराम गरिरहेका प्रधानमन्त्री ओलीको मृगौला रि-ट्रान्सप्लान्ट गराउने निश्कर्षमा नेकपाका नेताहरु पुगेका छन् । तर, मृगौला प्रत्यारोपणका लागि विदेश लैजाने कि नेपालमै गराउने भन्ने विषयमा भने निर्णय भइनसकेको नेकपा स्रोतले बतायो ।

‘गत मंगलबार एपेन्डिसाइटिसको शल्यक्रिया गरेको हुनाले अब डेढ/दुई सातासम्म प्रधानमन्त्रीले बेडकै आराम गर्नुहुनेछ । त्यसबेलासम्म होमोडाइलासिसबाटै काम चलाइनेछ’ नेकपा सोतले भन्यो, ‘त्यसपछि मृगौला पुनःप्रत्यारोपण गर्नुपर्ने चिकित्सकहरुको सुझाव छ । तर, स्वदेशमै गर्ने कि विदेश लैजाने भन्नेमा डाक्टरहरु अझै छलफलमै छन् ।’

केही चिकित्सकले यहाँ रिस्क नमोलौं, विदेशमै लैजाऔं भनिरहेको र केहीले चाहिँ बरु विदेशबाट चिकित्सकलाई यतै बोलाएर नेपालमै रि-ट्रान्सप्लान्ट गरौं भनिरहेको जानकारी दिँदै स्रोतले भन्यो, ‘यसबारेमा अझै ठोस निर्णय भएको छैन, अझै डेढ-दुई सातासम्म प्रधानमन्त्रीले अस्पतालमै आराम गर्नुपर्ने स्थिति छ ।’

प्रधानमन्त्री ओलीले सोमबार एक भिडियो सन्देशमार्फत आफ्नो स्वास्थ्यमा सुधार भइरहेको र बोल्न, समाचारहरु पढ्न सक्ने अवस्थामा रहेको बताएका छन् । अस्पतालबाट दिएको सन्देशमा प्रधानमन्त्रीले भनेका छन्,- ‘मेजर अपरेशनपछि पनि म उठेर बोल्न सक्ने, साथीहरुसँग कुरा गर्न सक्ने अवस्थामा छु, समाचारहरु हेर्न सक्ने अवस्थामा छु ।’ प्रधानमन्त्रीले आफ्नो स्वास्थ्य अवस्थाबारे अस्पतालबाटै दिएको सन्देशमा भनेका छन्, ‘इन्फेक्सन भएको हुनाले त्यो इन्फेक्सनलाई पनि हटाउनुपर्‍यो । त्यसकारण उपचारका क्रममा हप्ता/दश दिन लाग्ने भयो । तर, मेरो स्वास्थ्य राम्ररी सुधार भइराख्या छ ।’

प्रतिक्रिया