इमान्दार संवाददाता
५५ पटक

काठमाडौं । इन्डोनेसियामा सोमबार दुर्घटनामा परेको लायन एअरको विमानको खोजीकार्य जारी छ । ड्रोन विमान र पानीमुनि ध्वनीको तरंगबाट वस्तु पत्ता लगाउने प्रविधिको प्रयोगबाटसमेत समुद्रमा खोजी भइरहेको अधिकारीहरुले जनाएका छन् ।

राजधानी जकार्ताबाट १८९ यात्री र चालकदलका सदस्य लिएर उडेको बोइङ ७३७ विमान पाङकल पिनाङ जाँदैगर्दा उडेको १३ मिनेटमा नै जाभा समुद्रमा खसेको थियो ।

दुर्घटनामा परेको विमानबाट कोही पनि जीवित भेटिने संकेत नदेखिएको र उद्धारकर्ताहरुले समुद्रमा परिचयपत्र, चालक अनुमतिपत्रलगायत यात्रीका व्यक्तिगत सामान संकलन गरेका छन् ।

विमानमा समस्या आएको भन्दै पाइलटले जकार्ता विमानस्थलमा फर्कने अनुमति लिएलगत्तै राडारसँग उसको सम्पर्क टुटेको थियो । राडारसँग सम्पर्क टुट्नुअघि विमान ३६ सय ५० फिटको उचाइमा उडिरहेको थियो ।

‘म्याक्स एट सिरिज’को उक्त विमान बोइङको नयाँ मोडलमध्येको एक भएको र केही महिनाअगाडिमात्रै इन्डोनेसिया पुगेको बताइएको छ ।विमानका उपकरणमा अघिल्लो दिन नै समस्या देखिएको बीबीसीले जनाएको छ ।

विमानको प्राविधिक ‘लग बुक’बाट प्राप्त जानकारीअनुसार आइतबार बालीबाट जकार्ता आउनेक्रममा विमानको उपकरणमा गम्भीर समस्या देखिएको थियो ।

पाइटलले विमानको केही उपकरण ‘भर गर्न अयोग्य’ रहेको उल्लेख गरेका थिए । यति हुँदाहुँदै पनि विमान उडाउनुको कारणबारे गम्भीर बहस सुरु भएको छ । सन् १९९९ मा स्थापित लायन एअरको सुरक्षा रेकर्ड र कमजोर व्यवस्थापनबारे विभिन्न प्रश्न उठेका थिए । (एजेन्सी)

२०७५ कात्तिक १३ गते प्रकाशित

    फेसबुक ट्वीटर

    तपाईं हामीसँग  फेसबुक र ट्वीटर मार्फत् पनि जोडिन सक्नुहुन्छ ।

प्रतिकृया दिनुहोस्

खाली एड

Loading...