इमान्दार संवाददाता
२८०३ पटक

काठमाडौं ।

भेनेजुएलाको एक जेलमा भएको झडपमा ६८ जनाको मृत्यु भएको छ । समाचार एजेन्सीहरुका अनुसार भ्यालेन्सियास्थित जेलमा बुधबार कैदीबीच झडप भएको थियो ।

झडपकै क्रममा केही कैदी भाग्ने प्रयास गर्दा सुरक्षाकर्मीले गोली प्रहारसमेत गरेको बताइएको छ । सुरक्षाकर्मीको गोली प्रहारबाट कति र झडपबाट कतिको मृत्यु भयो भन्ने प्रष्ट भएको छैन । मृतक सबै कैदी हुन् या सुरक्षाकर्मी पनि छन् भन्नेसमेत प्रष्ट हुन सकेको छैन ।

अधिकारीहरुका अनुसार घटनाको छानविन सुरु गरिएको छ ।

समाचार एजेन्सीहरुका अनुसार ६० कैदीबन्दीको क्षमता भएको सो जेलमा क्षमताभन्दा बढी कैदीबन्दी राखिएको थियो । जेलमा झडप भएको खबर प्रकाशमा आउनासाथ जेल बाहिर कैदीका आफन्तहरु जम्मा भएका थिए । प्रहरीले उनीहरुलाई हटाउनसमेत बल प्रयोग गरेको बताइएको छ ।

उता पाकिस्तानमा बलात्कार पीडित युवतीका दाजुले पीडकको परिवारसँग मिलापत्रका नाममा बलात्कार गरेको घटना प्रकाशमा आएको छ ।

यो घटना पाकिस्तानको पञ्जाव प्रान्तको हो, जहाँ प्रहरीले बलात्कारमा संलग्न तथा सहयोगी भूमिका निर्वाह गरेको आरोपमा १२ जनालाई पक्राउ गरेको छ । समाचार एजेन्सीहरुका अनुसार एक बलात्कारीलाई कथित रुपमा माफी दिने र मिलापत्र गर्ने नाममा पीडित युवतीका दाजुलाई पीडककी बहिनी बलात्कार गर्न अनुमति दिनेहरुसमेत पक्राउ परेका छन् ।

‘डन न्यूज’का अनुसार टोबा टेक सिंह जिल्लामा एक युवकले २० मार्चमा एक महिलालाई बलात्कार गरेका थिए । घटनापछि आरोपीका परिवारजनले पीडित परिवारसँग माफी मागेका थिए । पीडित परिवारले माफीका लागि शर्त राखेको थियो । पीडित परिवारले पीडककी बहिनीलाई बलात्कार गर्ने शर्त अघि सारेको र उक्त शर्तलाई पीडिकका परिवारले समेत स्वीकार गरेको बताइएको छ ।

सोही सहमतिअनुसार बलात्कारको बदलामा बलात्कार भएको थियो । दुवै परिवारले एक अर्कामाथि कानुनी कारवाहीका लागि उजुरी नगर्ने लिखित सहमतिसमेत गरेका थिए ।

अघिल्लो बलात्कारसम्बन्धमा प्रहरीमा दिएको उजुरी फिर्ता लिने क्रममा दुवै परिवारले आपसमा कानूनी कारवाहीका लागि उजुरी नगर्ने सहमतिपत्रसमेत प्रहरीमा पेश गरेका थिए । प्रहरीले सोही सहमतिपत्रलाई संदेहको नजरले हेर्दै थप अनुसन्धान गरेको थियो ।

सोधपुछका क्रममा बलात्कारको बदलामा बलात्कार भएको घटना प्रकाशमा आएपछि प्रहरीले व्यापक गिरफ्तार गरी कानूनी कारवाही अघि बढाएको हो ।

पञ्जाव प्रान्तमा बलात्कारको बदलामा बलात्कारको घटना दोस्रो पटक प्रकाशमा आएको हो । यसअघि गत वर्ष जुलाईमा पनि सोही प्रान्तको एउटा गाउँमा पञ्चायतले बलात्कारको बदलास्वरुप बलात्कार गर्न एक युवकलाई अनुमति दिएको थियो । आफ्नी बहिनीको बलात्कारको बदलास्वरुप ती युवकले पञ्चायतकै सामू पीडकको बहिनीलाई बलात्कार गरेका थिए । (एजेन्सी)

२०७४ चैत १५ गते प्रकाशित

    फेसबुक ट्वीटर

    तपाईं हामीसँग  फेसबुक र ट्वीटर मार्फत् पनि जोडिन सक्नुहुन्छ ।

प्रतिकृया दिनुहोस्

खाली एड

Loading...